Tura: Garo Hills Autonomous District Council (GHADC)-ni kam ka·anio tik ong·gijaniko nikna man·engani ja·man MDC aro Raksamgre-oni NPP MLA Benedic Marak -ko 13-15 vote margin-chi ra·galaha, aro uni biapo gital CEM-ko songna cholko oataha.
Kobor man·soani gitade, National People’s Party (NPP), Benedic-ni palo Rakesh Sangma-ko donnaba gnang.
Indake ra·gala man·gipa CEM Benedic Marak, AITC-ni MDC aro sakgni BJP dilgiparangni chakpaanio changsatai CEM biapna susataigen.
NPP party rank-ni bidingo meligrikjani gimin Benedic-ko executive committee-ni dilgipa ong·aoniko ra·galna nangnikani sokaha. Sak 9 EC memborrang kamoni resign ka·aha, minggipin CEM an·tangba sakgittam chairperson-rangko GHADC-oniko ra·galataha. Indake uamangni biapo opposition AITC-oni sak 3 MDC-rangko ra·skaha.
Council-ko dilanio a·dokni dilgiparangni kosako chakate kam ka·ani gimin CEM post-oniko ra·galaha ine Benedic, aganaha. Unbaksana ma·mongoniko council-na tangka-paisani gita dakchakaniko man·na jotton ka·anio GHADC-na chu·gimik bilko on·jani giminba a·dok sorkariko matnangaha. Uandake Council-ni employee ba kam ka·giparangna kritmasna skang dormahako on·na ja·ku de·aniko uni party memborskarangan namnikjaha. Uni ja·ku de·aniara ma·mongni on·atgipa tangka paisako chamanio meligijaniko ra·bagen ine chanchitokaha.
Indake ong·engon NPP MDC-rang, gitcham CEM-ko party-ni bimingko ong·siata ine matnangaha, unbaksana GHADC-o donggipa neng·nikanirangko namatna cholko sandianio Chief Minister Conrad Sangma-ko grongjani giminba matnangtokaha.
Iarangni gisepon da·al Sombar sal January 31 tariko CEM-ni post-na vote on·anggen.
