Tura: Gitcham CEM aro NPP-ni MDC aro MLA Benedic Marak-ko ra·galani gimin Garo Hills a·jani dingtang dingtang NGO-rang jagoka baksa jajrenganiko parakataha. Benedic-ko ra·galaniara mikkangchi GHADC-o tom·tomgijani ba golmal ong·aniko ra·banaba gnang ine chanchitokaha.
Dingtang dingtang NGO-rang jekai- GSU, FKJGP, AYWP, ADE, GGU, Tura Senior Citizen’s Forum aro NTDF, apsan ong·e kobor ra·timgiparangna parakatengon, “Garo Hills a·jani civic body ong·pae, chinga manderangna jajrengani sokaniko gelna man·ja” ine parakataha.
“GHADC-ko dilanio Benedic, namen kam ka·aha. Employee ba kam ka·giparangni adita ru·uta sal somoioni man·kugija dongenggipa dormahani mamlaoba kam ka·aha aro kam ka·giparang baksa namen agangrikaha. Council-o chu·onga gita tangka-paisa dongjagenchimoba Benedic, an·tangni man·a dipet kamko ka·aha, ine NGO-rang aganaha.
Uandake civic bodies, NPP-ni dilenggipa sorkariko, ’employee-rangni dormahani bidingo strike ka·a ba jingjengatani ru·utkujaenga’ ineba gisik ra·ataha.
“Kam ka·giparang baksa ka·sine agangrikenba uamangko kamona re·bapilchina okamaha, chingni kattako knae aro chingo bebera·e kam ka·giparangba kamona re·bapilaha. Iarangkon ra·gala man·gipa CEM chu·sokataha. Ua an·tangni ku·rachakgimin gitan kam ka·gipa ong·chongmota ine chinga bebera·a. Uko ra·galahaode mikkangchi GHADC-o kam ka·giparangni gimin agana man·jawa. Indake Benedic-ko ra·galaniara, kam ka·giparangnasan ong·aigija party-naba namen andalani ong·naba gnang, ineba agankuaha.”
Indake ong·engon NGO-rang, Benedic-ko ra·galanio GHADC-ko ga·akatna jotton ka·enga ineba potchipenga.
“Benedic-ni jotton ka·ani a·selsa ma·mong sorkari, GHADC-na bang·bate tangka chamatna ra·chakaha. Uandakgipa mandeko bodolahaode, Council-o namen so·sojengjeng ong·aniko ra·banaba gnanga.”
GHADC-o badia political party, EC-ko rika, iani giminde jajrengja indiba kam ka·giparangko kragija dakaniko chinga nie dongna man·jawa ine NGO aganaha.
“Congress aro NPP dolgnini dilgipa EC-on GHADC, chu·sokjaha. Indiba Benedic-ni dilgipa EC-o kam ka·giparang namgniko man·tokengachim.
“Iandakgipa obostarango chinga jrip dongjawa, maina Benedic baksa chinga, GHADC-o kam ka·giparangna uamangni dormahako on·na ku·chakaha. Darang politician-ba darang mandeni janggi tanganiko kal·e rona man·jawa.”
NPP-ni dilenggipa sorkarini CEM-ko ra·galna tik ka·aniko jegalate, NGO-rang, Benedic-ko uni biapo donpilchina dabiaha.
Kobor man·soani gitade, Benedic-ko ra·gale gipinko donskana miksongenga ine kobor man·e NGO-rang namnikjae jegaltokataha.
“Gipin mandeko chinga ra·chakjawa, ine janapatenba NPP dilgiparangko, iandakgipa chanchianiko watgalna mol·molataha.”
