TURA: Gitcham IAS officer Bhalang Dhar-ko Meghalaya Lokayukta-ni Chairperson songaniko Williamnagar-oni saksa an·tangko songsalna kam ka·gipa ine a·kangenggipa Nilbath Ch Marak jegalataha.
Iani bidingo Meghalaya a·dokni Governor-na sedoatengon, gitcham IAS officer Bhalang Dhar-ko Lokayukta-ni Chairperson songaniara niamni a·palo ong·enga maina Meghalaya Lokayukta Act-ni dongimin niam gita uni kamrangara ong·jachim ine Marak parakataha.
Lokayukta-ni Chairperson-ko songna gita Meghalaya Lokayukta Act-ni ning·o dongimin niamni gimin talataniko on·angengon, dongimin niam gitade High Court-ni Chief Justice ba High Court-ni Judge ong·gimin manderangsa Lokayukta-ni Chairperson ong·na niam dongachim ine Marak parakataha.
