Tura: Salgnina ong·atgipa Non Cooperation Movement (NCM)-ni gnigipa salba namen tom·tomen matchotaha. Dingtang dingtang organisation-rangni bakrime ong·atgipa jingjengatanio Garo Hills-ni dambonga district-rangon maming golmal ong·a gri tom·tomen matchotangaha. Mitam district-rangode sorkari office-rango ong·rongbewal gitan kamrangko ka·angaha.
Bang·a dingtang dingtang NGO-rang – GSU, FKJGP, ADE, AYWO, FAF, NTDF, TSCF, GGU, NESO aro NGEA, GHADC-o Rakesh Sangma-ko gital CEM seokani gimin jegale salgnina Non Cooperation Movement-ko ong·ataha.
Feb 3 taro 4 tariko salgnina pring 5 bajioni atam 5 bajiona jingjengatangaha.
Jingjengatanio sorkari office-rangode ong·rongbewal gitan kam ka·anirangko nikna man·aha indiba business aro office establishment-rangko chipataha. Garo Hills-o sin·a bilongako chagrongengon bang·a manderangan noktangtango dongna namniktokaha. Jingjengatani salgnion ramao re·ruragipa garirangko darang civil organisation-rangan champenga dongja.
“West Garo Hills-ni sorkari office-rango 60-70 percent kam ka·giparang kamona soktokaha. District-o maming a·sel ong·anirang dongja, ine WGH-ni deputy commissioner Ram Singh, koborna u·iataha.
Uandake EGH DC, Swapnil Tembe-ba office-ona bang·batan re·batokaha aro district-o maming golmal ba a·sel ong·anirang dongja ine parakataha.
