TURA: Garo Hills Autonomous District Council (GHADC)-ni gital chief executive membor (CEM) Rakesh A Sangma, skul napmiting somoirangode ‘Sangma’ ma·chongko segija ‘Newar’-kosa seachim aro election-na skangmangmangsa an·tangko ‘A Sangma’ ine affidavit ka·aha ine NGO-rangni a·kanganiko CEM Rakesh Sangma-ni ma·gipa Gracie Margaret A Sangma jegalatskaenba, iani bidingo talataniko on·angaha.
GHADC-ni gital CEM Rakesh Sangma, skul napmiting somoirangode an·tangko ‘Sangma’ segija ‘Rakesh Newar’ inesa seachim aro 2020 bilsini GHADC election-na skangsan ua ‘A Sangma’ ine an·tangko affidavit ka·aha ine Garo Hills-ni GSU, ADE, FKJGP, AYWO aro NESO dolrang parakatenba, uko CEM ong·aoniko ra·galpilchina dabiengachim ine nikna man·a.
NGO-rangni a·kanganiko jegalatskaengon, uni depante atchiaonin ‘A Sangma’ ong·a aro da·oba apsanan ong·enga ine Rakesh Sangma-ni ma·gipa Gracie Margaret A Sangma parakatskaaha.
“Angni depante Rakesh A Sangma atchiaonin ‘A Sangma’ ong·a aro ua maming saloba an·tangni ma·chongko dingtangata dongkuja. Anga an·tangan atchiaonin A·chik ong·e angni depanteba A·chikan ong·a,” ine Mongolbar salo CEM-ni ma·gipa parakataha.
A·chikrangni dakbewal gita Rakesh Sangma, an·tangni jikgipako noko dongija noktangonasa rimbae donaha ine NGO-rangni a·kanganiko jegalatengon, ian uamangni aro Rakesh jikgipani nokdango ma·sigrikchakgrikaniosa iako dakaha ine Rakesh Sangma-ni ma·gipa parakataha.
“Chinga nokdang ong·e pangnan nokdango dakrongbewal gitan janggi tangenga aro darangba chingni janggi tangani bewalko aganna man·ja. Chingni nokdangba nokdang ge·sasa ong·a aro TV-rango mesokgipa jawilwat ong·ja,” ine Gracie Margaret parakataha.
Uamangni pagitcham ma·gitchamrangonin uamangba Kristianrangni dakbewal rikbewalrangko ja·rikbaenggiparang ong·a ineba Rakesh ma·gipa parakataha.
“Angni obitegipa Man Bahadur Newar aro uni pagipa Tura-o nokdangko rikaha. Angni obitegipa sagi 1972 bilsio MLA ong·achim aro uni ja·man MDC-ba ong·achim. Tura-ni Lower Babupara-o nok rikna skang ua Tura-ni Chandmari jolon janggi tanggipa mande ong·achim,” ine Gracie Margaret A Sangma parakataha.
Uni depante Rakesh Sangma-ko niam gitan GHADC-ni MDC seokaha aro ua Sixth Schedule-ni niamrango pangchaken GHADC-ni CEM ong·e kamko ka·anggen ineba gital CEM-ni ma·gipa parakataha.
Rakesh Sangma-ni CEM ong·aniko jegaljachina aro uni kosako jingjengatanirangko dakjachina gitaba Rakesh ma·gipa, NGO-rangko mol·molataha.
