Tura: Meghalaya, sorkari, a·dokni dairy sector-ko ra·dona nangnika chu·gimik kamrangko ka·enga, ine Chief Minister Conrad K. Sangma, Sonibar salo parakataha. ‘Dairy Mission’ programme-ni gita a·dok sorkari, dairy farming-ko bilakatna kam ka·enga.
“A·doko matchu dut man·aniko baridapatna Meghalaya sorkari, dingtang dingtang Dairy Cooperative Societies baksa kam ka·enga,” ine Chief Minister Sonibar salo West Garo Hills District Ganol-o gital Dairy Complex-ko songna pangchakaniko songe on·mitingo ia kattarangko aganataha.
Gital complex-ko rikanio kror 10.52 koros nanggen, jena National Programme for Dairy Development (NPDD), Government of India kror 9.15 tangkako on·ataha. Aro West Garo Hills-ni Milk Producer Union-ba lak 86.27 tangkako on·gilaha.
Ia gital plant-o litre 10,000 capacity donggen. Ganol-o da·o donggipa plant-ni capacity-ara litres 1,000 ong·a.
Uandake gital dairy complex-o chilling, processing, packaging aro distribution unit donggen.
Matchu-matte jile cha·aniara a·dokni matchu jile cha·giparangna ba farming community-na namgipa kamaiani chol ong·a, maina Meghalaya, bang·bata bosturangkon gipin a·dokrangonikosa ra·bana gita nanga.
“Niatgenchimode a·doko man·gipa 50 percent be·en-bitinrang jekai- wak, matchu, do·bok, do·o be·en, na·tok aro dut ba dutniko tarigipa bosturangko India a·songni dingtang dingtang jolrangonikosa ra·baa. An·chingni a·doko iarangko man·a komia. Matchu-mate jile cha·ani business-o a·dok, kror 4500-ko man·a, jeoni kror 2250-de gipin a·dokrangona sokangskaa, ine janapate, CM, jolni entrepreneur-rangko livestock sector-o cholko sandichina didiataha.”
Diary Mission, farming community ba matchu jile cha·giparang aro entrepreneurs through Cooperative Societies-ko dakchakna ba cholko on·na miksonge kam ka·a.
Indake ong·engon CM, Piggery Mission-ni giminba tom·anio u·iataha. Ia programme-ko a·bachengata ru·utkujaenga, aro ian a·songo dal·batgipa piggery project ong·a.
Iarangna agreba sorkari, Poultry Mission aro Goatry Mission-ko parakatna re·mikkangenga, ine parakatengon, manderangko sorkarini parakatgipa livestock programme-ni namgniko ra·china mol·molataha. Unbaksana Cooperative Societies-ko songe interest free loan-ko ra·china didiataha.
“Matchu mate jile cha·ani a·bao bang·bea cholrang dongako nikatna man·enga, ia programme-an bang·a nokdangna kamaini ba janggi tangna mongsonggipa cholba ong·gen, ineba CM agandapaha.”
Ganol-o riknasienggipa gital Dairy Complex-ara Meghalaya-o Garo Hills a·jani dol 15 Dairy Cooperative Societies-na namgniko on·gen.
