TURA: East Garo Hills a·jani Rongjeng Model Degree College-ko rikanirang namjaenga ine dingtang dingtang dolrangni badi ka·aniko man·ahani gimin Sonibar salo, East Garo Hills a·jani Deputy Commissioner Swapnil Tembe, Rongjeng-ni BDO aro engineer-rang baksa ia college-ko rikenggipa biapko nieaha aro kamrangko namdapatgen ine ku·rachakaniko on·ataha.
Adita salrangna skangsan, East Garo Hills a·jani GSU, FKJGP, AAYF aro ASWA dolrang, Deputy Commissioner-na sedoatenba, ia college-ko rikanirang namsrangjaenga ine badi ka·doangahachim.
Iani bidingo East Garo Hills a·jani Deputy Commissioner-na badi ka·e sedoatengon, ia college-ko rikgipa contractor, niam gita rikjahani a·sel college-ko kulina skangan nokni plaster-rang nosto ong·tokengaha ine dolbri NGO-rang matnangatahachim.
NGO-rangni parakatani gitade, ia college-ko rikmanaoni da·o jagittamsan ong·kuengoba nokkingrango da·on be·srianirangko nikna man·engahachim.
Site engineer ia nok rikaniko name nirokjahani a·selsa college nokko name rikjaha ineba dolbri NGO-rang matnangatahachim.
Indake ong·engon, ia nok rikaniko Deputy Commissioner an·tangan nina re·angenba, nok rikaniko namdapatgen aro pilakni gitan uamang nirok sandianirangko dakanggen ine jinmana ku·rachakaniko on·ataha.
Ia Rongjeng Model Degree College-ko rikna gita 2019 bilsini February jaon, a·songni Prime Minister Narendra Modi, video conference gita pangchakaniko songe on·angahachim ine nikna man·a.
Ia model degree college-ko Rashtriya Uchchatar Shiksha Abhiyan (RUSA)-ni ning·o gong kror 10.59 tangkarangchi rikengachim ineba nikna man·a.
Rongjeng-o Degree College rikagipako DC niea, kamrangko namdapatna ku·rachaka
Date:
Share post:
