TURA: Re·anggipa Sombar salo, 120 Battalion CRPF dolni gita Civic Action Program-ko Williamnagar-o ong·atangenba, dingtang dingtang bosturangko skulo poraienggipa chatro chatrirangna suale on·angaha.
Ia civic action program-ko ong·atanio 120 Bn CRPF-ni Commandant Pramod Kumar Singh, mongsonggipa sokgipa ong·e bakko ra·angaha aro unbaksana, 120 Bn CRPF-ni Second-in-Command Raghubir Singh, Assistant Commandant Vivek Kumar Singh, Williamnagar Govt Higher Secondary School-ni Principal Rajiv K Marak, Rongrenggre Higher Secondary School-ni Principal Sengsrang G Momin, skulni skigiparang aro chatro chatrirangba dongpae bakko ra·angaha.
Ia program-ko ong·atanio 120 Bn CRPF-ni Commandant Pramod Kumar Singh, chatro chatrirang baksa agangrikengon, an·tangtangni poraianirango chu·sokgiparang ong·na gita bimchipe poraichina didiangaha.
Sipai dolo kamna manderangko sandianio pilak nanga dakchakanirangko on·na gitaba ua ku·rachakangaha.
A·songna chel·chakanirangko on·na kamko ka·engon, a·songo songdongenggipa manderang baksa nangrimaniko ra·bana gita batanggimin somoirangoba iandakgipa civic action program-rangko CRPF dolni gita, a·dokni dingtang dingtang biaprango ong·atangahachim ine nikna man·a.
