TURA: South West Garo Hills a·jao Hullukona-ona Josipara-ona aro Josipara-oni Dingampara-ona dakanggipa PMGSY ramako tarigipa contractor, kamrangko matchotgija donchipahani a·sel da·o ramani obostarang namjabatroroengaha ine Garo Students Union (GSU) Zikzak unit, South West Garo Hills a·jani Deputy Commissioner-na badi ka·doangenba, ia ramako matchote tarina gita ge·etaniko on·china didiataha.
GSU Zikzak unit-ni parakatani gitade, ia kosako janapgimin PMGSY ramarangko, da·o Zikzak-ni MDC ong·enggipa Aktar Ali, uni MDC ong·na skang tariahachim indiba ia ramarangko ua matchotchipgija donahani a·sel da·o ramani obostarang namjabatroroe re·ruraenggipa manderang neng·nikanirangko chagrongna nangtokengahachim.
“Chingna badi ka·anirangko man·soahani gimin chinga ia ramarangko re·ange nion, ia ramarangara songni nokni manderangna aro mongsongbate skulrangchi re·enggipa chatro chatrirangna mongsonggipa re·a doani chol ong·achim ine nikna man·aha indiba ia ramarangko taria matchotgija galchipahani a·sel da·o manderang re·ruraanirangko namen neng·nikanirangko chagrongna nangtokengaha ine chinga nikna man·aha. Jolo songdongenggipa manderangni chingna aganani gitade, ia ramako matchote tarichina uamang ia contractor-ko changni chang didiahachim aro ua an·tangba ia ramarangko matchote tarina ku·rachakahachim. Indiba ua Zikzak-ni MDC ong·ani ja·man, manderangni agananirangko knachakna gisiko nangjaenga,” ine GSU Zikzak unit-ni dilgiparang parakataha.
Wachi kari soktaina skangan ia ramarangko matchotatchina gita ia contractor-na ge·etaniko on·chinaba GSU-ni dilgiparang, South West Garo Hills a·jani Deputy Commissioner-ko didiataha.
