SHILLONG: Meghalaya a·dokni gital Director General of Police (DGP)-ko songna gita da·o dipet sorkari kamrangko a·bachengkujaenga.
A·dokni Home Minister Lahkmen Rymbui-ni kobor ra·timgiparangna parakatani gitade, gital DGP-ko songanio sorkari pilak niamrangkon ja·rikesa songgen.
“Da·o dipet chinga kamrangko a·bachengkujaenga,” ine Home Minister aganaha.
A·dokni gital DGP-na Union Public Service Commission (UPSC)-ni gita minge donenggipa sakgittam IPS officer-rangara, 1991 batch-ni Lajja Ram Bishnoi, 1989 batch-ni Mukesh Agarwal aro apsan 1989 batch-ni KV Singh Deo ong·achim.
Ia sakgittam IPS officer-rangoniko sorkari nambatgipa officer-kosa DGP-na seokgen ine talataniko on·angengon, a·dokni namgnina aro police department-ni kamrangko nambate chalaina man·na gita nambatgipa officer-ko seokaniara namen nangchongmotgipa ong·a ine Rymbui parakataha.
“A·doko ong·enggipa obostarangko name nirokna man·gipa DGP-kosa an·ching a·dokna nangenga,” ine ua aganaha.
1989 batch-ni Lajja Ram Bishnoi-ko a·dokni gitcham DGP, a·dokni gital DGP-na dake donangenga ine songbadrango seanikoba a·dokni Home Minister, chanchichipe seanisan ong·aia ine jegalataha.
Sakgittam IPS officer-rangoni Mukesh Agarwal-an dal·batgipa officer ong·ani gimin a·dokni gital DGP songanide ong·engachim indiba ia sakgittamoni jekoba sorkari songna gita man·skaaia ine adita salrangna skangsan sorkari official saksa parakatahachim.
