TURA: South Garo Hills a·jao Deku bazar-oni Dimapara PWD ramaona dakanggipa PMGSY ramako tarianirang namsrangjaenga ine GSU Gasuapara unit aro FKJGP Gasuapara circle matnangatenba, ia rama tarianiko nirokatchina gita South Garo Hills a·jani Deputy Commissioner-na sedoataha.
Ia dolgni NGO-rangni parakatani gitade, Deku bazar-oni Dimapara PWD ramaona dakanggipa ramako tarina gita PMGSY scheme-ni ning·o sanction ka·enba, company ge·sana kamko on·ahachim indiba ramako tarianio kamrang namen olgrokengachim.
“Ia ramao hume pipe ge·gittamko 2021 bilsini September jaonin tarina a·bachengahachim indiba hume pipe-rangko tariani namen namsrangjaenga aro da·onan matchotkujaenga. Ia ramao ro·ongrangko galaniba namen namsrangjani a·sel rama gita re·ruraenggipa gari gorarang neng·nikanirangko man·tokenga,” ine Gasuapara-ni GSU aro FKJGP dolrang parakatenba, ia rama tarianiko nirokatchina aro kamko jako ra·enggipa contractor-rangni kosako nanga gita ja·kurangko de·china, South Garo Hills a·jani Deputy Commissioner-ko didiataha.
