TURA: Skigiparang, uamangni batanggimin ja bongani dormahako man·jaengani gimin All Garo Hills SSA School Teachers’ Association (AGHSSASTA)-ni bimango jingjengataniko dakenba ‘kam ka·gija dongna’ tik ka·aha.
March 11-ni gisepo uamangna on·gija donchipenggipa dormaharangko a·dok sorkari on·jaode, March 14 tarikoni class-rangko ra·aniko, porikkarangko ra·aniko, medical duty-rangko, training, election duties (BLO) ugitarangko man·chape uamangni pilak duty-rangkon antisana ka·jana gita Skigiparang tik ka·aha. Uamangni pilak kamrangkon ka·gija dontongna gita mijalo Turao AGHSSASTA-ni tom·anio tik ka·aha.
“Chingna da·alona kingkingba ja bongani dormaharangko on·gija donengani gimin, chingni salantio nanggipa cha·anina, garini tona, school fees, electricity ugitarangna gamnan chinga neng·nikani man·enga. Skango ja bonga ba ja dokprako jasa jagnini dormahako on·aianikode chinga chu·ongnikja. Chingni bangki man·gnirangko man·jaode, chingni pilak dakgni kamrangko ari gri dontongatgen” ineba skigiparang koborna parakaha.
Unomitingo press ba media-ni kosako uamang matnanganirangko aganaha ine ge·sa joltangni social mediao separakaniko AGHSSASTA jeataha. Uamangni ku·rangko mikkangona sokatanina uamang media-ko mittelaha aro mikkangchiba indaken ong·angkugen ine ka·donganikoba parakaha.
