SHILLONG: Garo Hills-o niam gri ro·ong quarry-rangko bikote Bangladesh a·songona salangengani a·sel samtangtango ong·telaigiparangna nangchakeaniko ra·baengani gimin niam gri ro·ong bikotaniko champengchina gita a·dokni BJP dol, Meghalaya High Court aro National Green Tribunal (NGT)-ko didiangaha.
“Garo Hills-o niam gri chalaienggipa ro·ong quarry-rangko mande ra·ako man·na kragipa High Court aro NGT niatna nangchongmotenga. Pipulbari jolrango aro East Garo Hills a·jao bang·en ro·ong quarry-rangko niam gri chalaienga. A·kawe jolrango ro·ong quarry-rangko jakgitelen chalaina man·enga aro ia ro·ongrangko truck-prako gong 2500/- ‘goonda tax’-ko game Bangladesh a·songpna watatenga,” ine BJP-ni state vice president aro Tura-ni MDC Bernard N Marak parakataha.
A·doko niam gri koela bikotanirangko am·sandichina gita ge·etaniko on·ahani giminba ua dingtangmancha Meghalaya High Court-ko mittelpilangaha.
Marak-ni parakatani gitade, nangana bate ro·ong salenggipa truck garirang, walni somoirango maming challan gri Tura jilla gitan re·pakangenga indiba ia kamo dal·dalgipa manderangan jak dongani a·sel police-rangba ia garirangko champengna man·jaengachim.
Ro·ong salruragipa garirang nangana bate ro·ongrangko salengani a·selan Tura-ni ramarang aro da·o tarienggipa Tura-Dalu ramaba nosto ka·ako man·piltaina sienga ine janapatengon, ia ro·ong salgipa truck garirang walantian re·ruraengani a·selan Tura Babupara-o donggipa Civil Surgeon (CS) office sambani ramaba jakasichipakni da·o naptomrikrikangengaha ine Marak parakataha.
Ia garirang maikai challan gri weigh bridge aro police check gate-rang gita re·bana man·enga ine sing·doangengon, ia kamrangko sorkari champengjaenga ong·ode High Court-an manderangni bon·kamgipa ka·dongani ong·aignok ine BJP-ni state vice president parakataha.
Manderangni gisepo changni chang sing·doanirang ong·katengoba darangan iani bidingo aganchakaniko on·na man·jaenga ine janapatengon, “Ia ro·ong quarry-rangoniko aro niam gri ro·ong salanirangoniko dal·dalgipa manderangan namgnirangko man·enga,” ine Marak matnangataha.
Niam gri ro·ong salgipa truck garirangni re·ruraanichi manderangni janggirangna kenchakna nangani, namroro silroroani donggijani aro sorkarina kajina man·dapanio noksan ong·na nangani ong·enga ineba Marak parakataha.
