TURA: Me·chikrangna mande ra·pilskaaniko dakna gita re·anggipa Mongolbar salo, Tura-ni Don Bosco College-oba International Women’s Day-ko maniangaha aro ia salko manianio Mother Teresa Home-o dongenggipa me·chikrangan mongsonggipa sokgiparang ong·e bakko ra·angaha. Ia salko manianio Wingi Ch Marak aro Maily R Marak-ba dongpae bakko ra·angaha.
Ia tom·anio West Garo Hills a·jani Chief Judicial Magistrate aro DLSA-ni Secretary MK Lyngdoh, jinmana aganprakengon, Domestic Violence aro POCSO Act-ni gimin talataniko on·angenba, banoba me·chikrangni kosako ong·gija dakanirangko nikgenchimode ba kobor man·genchimode Social Welfare department-na u·iatchina gita chatro chatrirangko didiangaha. Chatro chatrirangko dilgiparang ong·china gitaba ua didiangaha.
Ia tom·anio West Garo Hills a·jani Deputy Superintendent of Police KR Marak-ba dongpae jinmana aganprakengon, ia sal somoirango Meghalaya a·doko aro mongsongbate Garo Hills-o pekatgipa bosturangko jakkalanirang batroroengani gimin iani bidingo chatro chatrirangna mikrakatanirangko on·angaha. Pekatgipa bosturangoni chel·e dongchina chatro chatrirangko didiangengon, iandakgipa kamko bon·atna an·tangtangan dakgrikdilgiparang ong·china gitaba ua didiangaha.
Ia program-ko Tura Don Bosco College-ni Internal Complaints Cell (ICC) ong·atangaha aro tom·aniona re·bagiparangko college-ni Principal Fr Bivan Rodriques Mukhim, rimchaksoangaha.
