SHILLONG: Meghalaya a·doko Tura aro Shillong medical college-rangko kulichengna kamrangko ka·engani gimin da·o dipet gipin medical college-rangko kulidapna miksonganirang dongkuja ine Bristibar salo, sorkari parakataha.
Assembly-o Opposition AITC dolni sing·anina ia kattarangko Minister in-charge aganchakaha.
Meghalaya a·dokni Ri Bhoi, Jaintia Hills aro West Khasi Hills a·jarangoba medical college-rangko kulina sorkario miksonganirang dongama ine Mawlai-ni MLA PT Sawkmie sing·doangahachim.
Health & Family Welfare Ministry-ni website-o mesokani gitade, dingtang dingtang a·jarango ma·mong sorkarini scheme-chi dam 75-na baten medical college-rangko kulina gita India sorkari sanction ka·manahachim ine janapatengon, iani bidingo am·sandie Ri Bhoi a·jaoba medical college-ko kulina man·genma man·jawa cholrangko sandichina gita Mawlai MLA didiangaha.
Iani bidingo AITC-ni state president Charles Pyngrope-ba sorkariko sing·doangengon, Meghalaya a·doko admission-ko ra·na sikenggipa chatro chatrirang bang·genchimoba seat-rang chu·ongjaengon, maini gimin medical college-rangko kulidapna man·jawa ine Education Minister-ko sing·doangskaaha.
Ia sing·anirangna aganchakaniko on·angengon, medical college-rangko kulina ru·uta somoirangna skangan sorkari tik ka·ahaoba da·o Tura-o medical college-ko kulina kamrangko ka·engaha indiba Shillong-ode dingtang dingtang neng·nikanirang dongani a·sel kamrangko a·bachengna man·kujaenga ine a·dokni Education Minister Lahkmen Rymbui parakataha.
Indake ong·engon, a·doko medical-ko poraina sikenggipa chatro chatrirang bang·en donga ine Mawsynram-ni AITC MLA HM Shangpliang parakatskaenba, a·doko medical college-rangko kulidapna cholrangko sandichina gita sorkariko didiangskaaha.
