SHILLONG: Assam aro Meghalaya a·dokni simarango meligrikgijanirangko namatna kam ka·anio, Meghalaya a·dok ning·o ga·akgipa mitam A·chik songrangkoba Assam-o napatskana sorkari manchiahani gimin, re·anggipa Sonibar salo, ia songrango donggipa manderang sorkarini kosako jegalanirangko dakangaha aro iani bidingo chanchitaipilchina sorkariko didiangaha.
Sonibar salo, West Khasi Hills a·jani Gizang jolo donggipa Malchapara aro Salbari songni bang·bea manderang, sorkarini kosako jegalgrime re·jomangaha aro ia songrangkoba Meghalaya a·dok ning·on ra·china gita sorkario dabiangaha.
Iani bidingo Khasi Hills Autonomous District Council (KHADC)-ni dilgiparangkoba ta·raken ja·kuko de·china songni manderang didiangaha.
Malchapara aro Salbari songrango songdongenggipa manderangni parakatani gitade, a·bachengonin uamang Meghalaya a·dok ning·o dongpana skaniko sorkarina u·iatahachim indiba da·o ia biaprangko sualanio ia songgnikode Assam-o napatna gita Assam aro Meghalaya a·dok damgnini sorkarirang tik ka·skaahachim.
“West Khasi Hills regional committee-ni report-ko Chief Minister-na on·na skangan chinga committee-ni chairman-na chittiko see, ia songrangkoba Meghalaya a·dokon napatchina mol·molahachim indiba sorkari, chingni mol·molaniko knachakjaha. Malchapara aro Salbari songni manderang Meghalaya a·dokon ong·pana nangnikengoba, ia songgnikon Assam-o napatgen ine Meghalaya a·dokni Chief Minister Conrad Sangma, Assembly-o parakatskaaha,” ine Malachapara aro Salbari songni dilgiparang parakataha.
Iani bidingo GHADC-ni Chief Executive Membor-rangna sedoatengon, Malchapara songara Bandoh Raja jol ning·o ga·akgipa biapsa ong·a aro ian Me·kamkit chiringonade man·a ine jolni manderang parakataha. Meghalaya a·dokko man·na skangonin, Bandoh Raja jolrangkora Nonglang Rajani ning·o ga·akgipa biaprang inesa chanbaachim ineba Malchapara aro Salbari songni dilgiparang parakataha.
“Chingni songko Assam-o napataniko chinga nangnikjaenga indiba sorkari chingni mol·molaniko knachakjaenga gimin chinga namen suk ong·ja. Chingaba Meghalaya a·dok ning·o ga·akgipa songan ong·a ine chingo sakkirangba dongachim,” ine Malchapara songni saksa Jewash Sangma parakatenba, Malchapara aro Salbari songrangna agrede samba jolo donggipa pilak songrangkon Meghalaya-o napatskaenga ine talataniko on·angaha.
Ia songgnikoba Meghalaya a·dokon donchina mol·molatengon, uamangni mol·molaniko knachakgija sorkari, ia songrangko Assam-o napdraatode uamang jingjengatanirangko dakangkuaigen ine songni manderang mikrakataniko on·angaha.
