TURA: Adita salrangna skang, South Garo Hills a·jani Silkigre Ampangdamgre songo, an·tangni bilsi gittam ong·gipa demechikko gitok rasote so·otanina matnangako man·enggipa Lindrit N Sangma-ko police-rang rim·na sandiengoba man·kujaenga ine kobor on·aha.
Re·anggipa March-ni 17 tariko, Chokpot police station-ni ning·o donggipa Silkigre Ampangdamgre songo, Lindrit N Sangma minggipa mande, an·tangni bilsi gittam ong·gipa Chidimit Ch Sangma-ko gitok rasote so·otgalangahachim.
Koborko on·ani gitade, ia mandeara gisikni gita tik ong·gijagipa mande ong·achim aro ua an·tangni demechikgipako so·otani ja·man buringchipakna katangahachim.
Ia a·selni bidingo Silkigre 16A Elaka-ni Laskar, police-rangna kobor on·atani ja·man police-rang dos dakgipa mandeko rim·na sandiengachim indiba da·alona kingkingan ia mandeko rim·na man·kujaenga ine kobor on·aha.
Iani bidingo talataniko on·angengon, dos dakgipa mandeko police-rang rim·na sandiengkua aro bakan ia mandeko rim·na ka·dongenga ine South Garo Hills a·jani SP Rituraj Ravi parakataha.
