NGH-o Manda chibimako sorkari dolong kae on·kujaengani a·sel neng·nikaniko man·tokenga

TURA: Changni chang mol·molatani ja·manoba North Garo Hills a·jani Bugakol songo donggipa Manda chibimako sorkari dolong tarie on·kujaengani a·sel songni nokni manderang aro mongsongbate skulrango poraienggipa bi·sarang neng·nikanirangko chagrongna nangtokengaha ine songni manderang u·iataha.
Kobor on·ani gitade, Bugakol, Tombuma, Upper Sambrak, Lower Sambrak, Renggok Saram, Amerim, Rongmatchu aro Kentra songrango donggipa manderangni namgnina ia chibimako RCC dolong kabatchina gita songni manderang, 2018 bilsion a·dok sorkarina sedoate mol·molatahachim indiba da·alonan ia chibimao RCC dolongko rike on·kujaengani gimin songni nokni manderang an·tangtangsa tangka paisarangko, bol wa·arangko aro ma·manti nangchongmotgipa bosturangko on·gile, ia chibimako wa·achi jal·lang kabate re·ruratokengachim.
“Chinga Manda chibima paksao donggipa bang·a songni manderangan Dainadubi, Damra aro uandakgipa bazar antirangonasa re·ange chingni nangchongmotgipa cha·ani ringani bosturangko brena nangenga indiba chinga Manda chibimako re·batesa bazar antirangko cha·na nangengani gimin pucca dolong dongkujae namen neng·nikanirangko man·na nangtokenga,” ine songni manderang parakataha.
Kosako janapgimin songrango donggipa manderangni u·iatani gitade, ia songrango donggipa bi·sarangba Manda chibima paksao donggipa skulrangosa poraina nangtokengani gimin chibimako re·batesa skulrangona re·angtokenga nangenga indiba wachi somoirangode Manda chibima dal·baahaon, bi·sarang skulrangchi re·na man·tokjaha aro porikkarangko seenggipa chatro chatrirangba wachini somoirangode porikkarangko serikpana chol ong·jaengachim.
“Chinga 2018 bilsionin ia sorkario ka·donge chingni nanganiko niatchina mol·molatahachim indiba da·alonan chingni mol·molaniko sorkari knachakkujaenga. Ia chibimao chingna RCC dolongko rike on·pagenchimode chingaba re·a doanirango altubatpagnokchim,” ine Bugakol songni mande saksa parakataha.