Chokpot jolrango niam gri koela bikotengani a·sel chiring chibisikrang nosto ka·ako man·enga

TURA: South Garo Hills a·jani Chokpot jolrango niam gri koelarangko bikotengani a·sel dingtang dingtang songrango ringna jakkalenggipa chiring chibisikrang nosto ka·ako man·enga ine A·chik Association for Protection of Environment (AAPE) parakataha.
AAPE-ni joint secretary Lawrence A Sangma-ni parakatani gitade, Kakiza chiringara Chokpot jolo donggipa Gopgre, Rongma Kakiza, Kilborma, Paromgre, Damalgre aro uandakgipa songrang gita jokbae Dareng chibimao jokbrinegipa chiring ong·achim aro ia chiringkon Dagal Gopgre, Damalgre, Dagal Songgitalgre, Kenegre, Jongkolgre, Bil Nodongre, Bolchugre, Chokpotgre, Bibragre aro uandakgipa dingtang dingtang songni manderang ringna aro gipin kamrangnaba jakkalengachim.
Indake ong·engon, batanggimin somoirangonin ia chi gipoke jokbaengani a·sel songni manderang ia chiringko ringna aro gipin kamrangna jakkalna man·tokjaengani gimin ja·mano songni manderang, ia chini rong dingtange jokbaenganiko am·sandie nion, ia chibimaona jokbaenggipa chibisikrangon koelarangko niam gri bikotenga ine ma·sina man·aha.
“Ia songrango donggipa manderangni ku·sikchi badi ka·doangani gitade, batanggimin jarangonin ia biaprango koela badinggiparang niam gri koelarangko bikote salrurana a·bachengaha aro ia biaprango niam gri koela bikote salruraanirangko enforcement official-rangan nikengoba maming champenganirang dongjaenga. A·bachengonin ia jolrango niam gri koela bikote salruraanirangko sorkari official-rang champengatgenchimode da·alo ia chiring chibisikrang indake nosto ka·ako man·jawachim,” ine AAPE-ni joint secretary parakataha.
Ia jolrango niam gri koelarangko bikotenganichi chiring chibisikrang nosto ka·ako man·engani a·sel chio donggipa na·tok na·batrangba sina a·bachengengaha ineba AAPE-ni dilgiparang parakataha.
Mikkangchi ia jolrango donggipa chiring chibisikrangkosan ong·aigija samtangtango donggipa pilak ong·telaigiparangko tange rakkina man·na gita ta·raken ja·kuko de·china gitaba AAPE, Mining & Geolody department baksana pilak nangchakegipa official-rangko didiataha.