TURA: Re·anggipa Sombar walni 9:00 bajimango, North Garo Hills a·jani Bajengdoba police station-ni ning·o donggipa Moamari songona mongma matte mangsa re·baenba, ia songni nok te·bongako pe·e galangaha.
Ia nokrangko pe·e galangani ja·man Wildlife department-ni dolsa sipairang, ia mongma matteko rike galatna jotton ka·aha aro uandaken ia mongmako Mongolbar pringni 4:00 bajimango sambao donggipa buringchipakna rike galatna man·aha.
Ia songoniko Wildlife-ni sipairang rike galatna man·ahaoba ja·mano kobor on·timgiparangni u·iatani gitade, ia apsan mongma mattean buringoni ong·katbataiaha aro Assam a·dokchipak song damsaona re·angskaaha. Ia songo ia mongma matte, butchuma saksako chadrapaha ine koborko man·soaha.
Koborko on·ani gitade, ian Assam Goalpara a·jani Krishnai police station-ni ning·o donggipa song ong·achim.
Moamari songo mongma matteni pe·e galanggipa nokrangara, Mainal R Marak, Hobendro Sangma, Simrang Sangma, Somila Marak aro Chingjak Marak minggipa manderangni nokrang ong·achim ineba kobor on·timgiparang u·iataha.
