TURA: Garo Students Union (GSU) Phulbari unit-ni gital dilgiparangko seokani bidingo GSU-ni Western Zone (North) Dadenggre aro Western Zone (West) Raksamgre-ni gisepo meligrikgijanirang ong·engon, Phulbari unit-ni gital dilgiparangko seokna gita election-ko ong·atani bidingo GSU Dadenggre zone-ni election commission parakataha indiba iako apsan salon Raksamgre zone-ni gita jegalatskaaha.
Phulbari unit-ni election-ko ong·atani bidingo GSU WZN Dadenggre-ni gita u·iataniko on·angengon, uamang, jolo donggipa dingtang dingtang songni nokmarang, dingtang dingtang skulni dilgiparang arp Phulbari Garo Students Committee (PGSC) baksa chanchirimchengani ja·mansa ia election-ko re·baenggipa April-ni 22 tariko Phulbari-ni Shyamnagar Secondary School-o ong·atna tik ka·angaha ine parakataha.
Indake ong·genchimoba, Phulbari unit-ni election-ko ong·atna tik ka·aniko ia apsan salon GSU WZW Raksamgre-oniba jegalatskaaha aro GSU central executive committee (CEC)-ni ge·etani gri maming dakeba ia election-ko ong·atna bil dongja ine parakatskaaha.
“GSU Dadenggre zone-de da·o regional unit-san ong·aiaha aro Phulbari unit-ni election-ko ong·atna bil dongja. Phulbari regional unit-de GSU WZW Raksamgre-ni ning·o ga·akgipa unit-sa ong·aha aro iako GSU-CEC-ba ra·chakmanaha,” ine GSU WZW Raksamgre-ni president Tengroang Marak parakataha.
Iana skang, GSU Phulbari unit-ni election-ko ong·atani bidingo GSU Phulbari unit-ni deputy election commissioner John CA Sangma u·iatengon, nomination-ko April 6 tarikona ra·chakanggen, scrutiny-ko April 8 tariko dakanggen ine April-ni 22 tariko pu·one apsan salon result-ko parakgen ine u·iatahachim.
