NEW DELHI: Bilsi 122-ni gisepo ia bilsini March jaon India a·songo ding·batgipa somoi ong·aha ine Sonibar salo Indian Meteorological Department (IMD) parakataha.
India a·songni bang·bata biaprangon mikka waanirang komiahani a·sel ia bilsio ding·bataniko chakna nangaha ineba IMD official-rang parakataha.
IMD official-rangni u·iatani gitade, ru·uta bilsirangnan India a·songo mikka waani 30.4 mm ong·achim indiba ia chango mikka waani 8.9 percent-san ong·aiahani gimin pangna ong·rongbewaloni 71 percent komibatahachim.
1901 bilsioni ian India a·songo mikka waani komibatani gittamgipa ong·enga maina iana skang 1909 bilsio 7.2 mm aro 1908 bilsio 8.7 mm-san ong·aiahachim ineba official-rang parakataha.
“India a·song gimikni gitan ia 2022 bilsini March jao maximum temperature 33.10 degree celsius ong·ahani gimin ian batanggimin bilsi 122-ni gisepo ding·batgipa ong·aha,” ine IMD-oni parakataha.
IMD official-rangni parakatani gitade, pangna bilsian March jani gisepo 26.67 degree celsius-san ong·rongaiachim aro iana skang 2010 bilsini March jaoba 26.671 degree celsius-san ong·aiahachim.
India a·songni salgro saliram joloba ia bilsini March jao maximum temperature 30.73 degree celsius ong·e bilsi 122-ni gisepo ding·batgipa ong·aha aro iana skang 2004 bilsini March jao 30.67 degree celsius-san ong·aiachim ineba IMD parakataha.
Indake ong·engon, da·o salgnioni salbriona kingkingde Jammu, Himachal Pradesh, Gujarat, Jharkhand, Rajasthan, Uttar Pradesh aro Madhya Pradesh a·dokrango ding·anirang batroroangkunaba gnang ine IMD mikrakataniko on·angaha.
Mikkarang jime wagnigipa biaprangni bidingo janapatskaengon, April 2 tarikoni 4 tarikona Arunachal Pradesh, Assam aro Meghalaya a·dokrango mikkarang waangkunaba gnang aro Meghalaya a·dokni badiaba badiaba biaprangode ia salgnini gisepo mikkarang jimbate waangnaba gnang ine IMD-oni mikrakataniko on·angaha.
