TURA: Chatro chatrirangna gital chasongni skie ra·ani bewalko namdapatna gita Tura-ni Nivedita Girls’ School-na State Bank of India (SBI)-ni gita Computer Lab-ko kulie on·aha aro ia computer lab-ko Tura SBI-ni Assistant General Manager Dharmananda Banai, Bristibar salo oprake on·angaha.
Adita salrangna skang, Nivedita Girls School-ni managing committee, dakchakanirangko on·china SBI-ni official-rangko gronge agangrikeaha aro uandaken ia skulna SBI, computer ge·dokko dakchake on·ataha.
“Chasongni kri lekka porako on·ani bewalrangba dingtangroroengahani gimin chatro chatrirangna lekka porako skie ra·anio dakchakna gita chinga ia computer-rangko ia skulna dakchake on·aha,” ine Tura SBI-ni Assistant General Manager Dharmananda Banai parakataha.
Ia skulna computer-rangko dakchake on·ahani gimin ia skulni headmistress Pallabi Saha, SBI-ni official-rangko mittelpilangskaaha.
