TURA: West Garo Hills a·jao Rajabala-oni Hallidayganj-ona aro Tikrikilla-oni Chibinang-ona dakanggipa Agia-Medhipara-Phulbari-Tura (AMPT) ramako tarichipgija donengani a·sel ia ramani obosta da·o namsrangjaengaha ine All Meghalaya Minorities Students Union (AMMSU) parakatenba, ia ramako ta·raken tarie on·china gita a·dokni PWD (Roads) Minister Prestone Tynsong-na sedoataha.
AMMSU-ni president Nur Islam Sk-ni parakatani gitade, Chibinang-oni Rajabala-ona dakanggipa AMPT ramakode tarianirang matchotahachim indiba Tikrikilla-oni Chibinang-ona aro Rajabala-oni Hallidayganj-ona dakanggipa AMPT ramakode da·onan tarichipkujaengani a·sel ia ramako re·ruraenggipa manderang neng·nikanirangko chagrongna nangtokengahachim.
“West Garo Hills a·jani a·kawe jolrango songdongenggipa manderangnade Tikrikilla-oni Hallidayganj-ona dakanggipa AMPT ramaan mongsongbatgipa rama ong·e manderangni pangchakna nangenggipa rama ong·achim indiba Tikrikilla-oni Chibinang-ona aron Rajabala-oni Hallidayganj-ona dakanggipa bakrangkode da·onan tarichipkujaengani a·sel ia jolrango songdongenggipa manderang neng·nikanirangko chagrongna nangtokengaha. Ia ramako tarichipgija donengani a·sel da·o ia ramako matchu garimangmangan re·na man·jaengaha aro saa ding·a donggipa manderangnade ia rama gita salruraaniara namen kenchakna nangani ong·engaha,” ine AMMSU-ni president parakatenba, ia ramako ta·raken tarie on·china a·dokni PWD (Roads) Minister-ko mol·molataha.
Rama jal·langrang namjaengani a·selan a·kawe jolrango songdongenggipa manderang mamingni gitan tang·dopana man·jaenga ineba Islam Sk parakataha.
