SHILLLONG: Shillong Mawiong-o rikgipa Inter-State Bus Terminus (ISBT)-ko a·bachengataan ru·utkuja, antidokrangsan ong·kuenga, aro ia ISBT-ko kror 48 koros bon·e rikahachim indiba building-ni structure-ni chong·mot obostako da·on nikna man·aha. Structure-ni obosta namgijaniko ong·telaigipa bewalrangchin mesokaha.
May 13 tariko mikka balwa ta·rakangaha, unon buildingni obostako nikna man·aha, jekon bilsi 2021 July jao Union Home Minister Amit Shah, oprakate on·ahachim.
Mni Sukrobar salo social media-o ISBT-ni ceiling-oni leak ba nokking sela, pakmarang be·sria iandakgipa video-rang gipaha, jeni a·sel ia dam rake rikgipa buildingni gimin sing·doanirang nakataha.
Project-ko State PWD (National Highway Division) jako ra·e kam ka·enba matchota ja·man re·anggipa bilsio oprakate Transport Department-na pakwataha, ine Sonibar salo PWD -ni a·gipi official, The Shillong Times-ni kobor ra·timgiparangna u·iataha.
Iarangni gisepon pakwa be·sria, nokking selani gimin sing·on official, Transport department-kosa matnangskaha, building-ko pakwatna skangde, iandakgipa badi ka·anirang dongjachim ine aganaha.
Minggipin da·odipet Transport Department-oniko chinga iandakgipa badi ka·anirangko man·sokujaenga ineba official agandapaha.
Niatgenchimode project-ko bilsi 2013-o North Eastern Council (NEC) sanction ka·aha, aro kror 48-ko chamataha. Indake bilsi 7 ja·man project-ko Union Home Minister bilsi 2021-o oprakate on·aha.
Indiba ISBT-ko ia bilsini April jaonisa a·bachengataha. Minggipin ISBT-ko a·bachengataonin ISBT aro Shillong songjinmaoni gisepo gari para dam rakani giminba sorkariko matnangtokenga. Da·onan sorkari gari para dam rakani mamlko namatna man·kujaenga, unomitingo ISBT structure-ni obosta namgijani mikkangkoba nikna man·aha.
