SHILLONG: Batanggimin 2019 bilsio ra·gatgipa Sports aro Youth Policy-ko da·onan a·dok sorkarini ja·rikkujaengani gimin Hynniewtrep Youth Council (HYC) mija Sukrobaro Sports aro Youth Affairs Minister, Banteidor Lyngdoh gronge agangrikangaha aro uamangni suk ong·gijaniko parakaha.
Minister-ko gronge agangrikani ja·mano koborni manderangna aganengon, jasani gisepon kamrangna re·chakkatgen ine minister ka·dongataniko on·aha inenba HYC chief, Robertjune Kharjahrin aganangaha.
A·doko Sports ba kal·susaani a·bako namdapatna gita Sports Policy-ko jakkalna nanga aroba national aro international-o medal chegiparangna scholarshiprangko aro gipin dakchakanirangko on·na nanga ineba ua aganangaha.
Youth Policy-ni gita, uko jakkalaniko nirokna gita Chief Minister-ko Chairman done High-Powered Committee-ko songna nanggipakoba da·onan songkuja ineba Kharjahrin aganaha.
HPC niam gitade, jadokprako changsa tom·na nangao ga·aka indake ia Sports aro Youth Policy-ko jakkalna gita a·dok sorkarini ja·ku de·anirangko chinga nie donggen ine HYC aganaha.
