SHILLONG: International Yoga Day-ko manisamsoani bak gita re·anggipa May-ni 13 tariko, Martin Luther Christian University (MLCU)-ni NSS Unit aro MLCU-ni Dean office-ni gita nangrime, Yoga-ni bidingo workshop-ko ong·atangaha.
International Yoga Day-ko a·gilsak gimikon June 21 tariko manirongenga aro ia salko manisamsoani bak gita MLCU-o ia workshop-ko ong·atangaha.
Ia workshop-ko ong·atanio RYS 200 Yoga Teacher aro Escape Yoga Studio-ni nokgipa Eugenia Davida Hek, yoga kal·anichi manderangna namgniko ra·bana man·ani gimin talatanirangko on·angaha.
Ia workshop-ko ong·atanio ua Yoga kal·anikoba, MLCU-ni chatro chatrirangna, skigiparangna aro university-o kam ka·enggipa manderangna dake mesokangaha.
An·tangtangko an·seng baljoke rakkina aro gisikni gita pangnan an·seng dongna Yoga-ko kal·jringchina gitaba ua program-o bak ra·giparangko aro mongsongbate chatro chatrirangko didiangaha.
