SHILLONG: Assam aro Meghalaya a·dokni simarango ong·enggipa golmalrangko namatna ja·ku de·anio, Meghalaya a·dokni mitam songrangko Assam-o napatna gita a·dok damgnini Memorandum of Understanding (MoU)-o soi ka·grikchengani somoiode pilak dolrangan jegaltokahaoba da·o NPP-chi dilenggipa Meghalaya Democratic Alliance (MDA) sorkario bakrimenggipa dolrangni jrip dongengahani gimin a·dokni BJP dol sing·doangaha.
BJP-ni state president Ernest Mawrie-ni parakatani gitade, adita salrangna skang MDA-ni tom·aniko ong·atanioba bang·bata dolrangan iani bidingo sing·doanirangko dakjahachim.
Chief Minister Conrad K Sangma-ni dilanichi adita salrangna skangsan MDA-ni tom·aniko ong·atangahachim aro ia tom·anio TMC-ni dilgiparang, chong·motan Charles Pyngrope aro George Lyngdoh-ba dongpaahachim ine Mawrie parakataha.
“MoU-o soi ka·grikani somoiode dingtang dingtang dolrang jegaltokachim indiba MDA-ni tom·aniode darangba iani gimin sing·dogiparang dongjaha,” ine Mawrie parakataha.
MDA-ni tom·aniko ong·atanio apsan kattarangni giminan Chief Minister, talataniko on·aha aro ianode darangba maming jegalanirang dongjaha ine BJP-ni state president parakataha.
“Ua somoio pilak dolrangan, bangki dongkuenggipa damdok biaprangkoba ta·raken namatna gita ja·kuko de·chinasa sorkariko mol·moltokaha aro ia kamko bakan a·bachengatna gita Chief Minister ku·rachakaha,” ine Mawrie aganaha.
A·dok damgnini soi ka·grikgimin MoU-ko nipiltaichina gita darang dolrangan sorkariko didijaha ine janapatengon, KHADC-ni mitam membor-rangsa iani bidingo Supreme Court-o badi ka·na miksongenga ine mitam political dolni dilgiparang, ia tom·anio janapaha ine Mawrie parakataha.
Ia MoU-o soi ka·grikaniko ua BJP-ni state president ong·e chu·ongnikaiama ine sing·on, ia mamlako skangonin election-ni somoirangosan janaprongaia indiba ia sorkaride, a·dok damgnini simarango meligrikgijaniko namatna gita ja·kuko de·chakataha ine BJP-ni state president parakataha.
