JOWAI: Re·anggipa Robibar salo, Jaintia Hills-ni Mutong songona picnic cha·na re·ange, Moopun chidareo sripgipa mandeni manggisiko, salbrini ja·man Bristibar pringo, chio balboe dongako man·aha.
Ia mandeara Rajasthan a·dokoni Monu Mahariya minggipa mande ong·achim aro ua Robibar salo, an·tangni ripengskarang baksa ia biapo picnic cha·na re·angahachim.
Ia mandeni manggisiko man·ani ja·man, post mortem ka·na gita Khliehriat Community Health Centre (CHC)-ona watataha.
Koborko on·ani gitade, chio sripe sianggipa mandeara, Mooralang Jowai-o donggipa hardware dokkano kamko ka·engachim aro Robibar salni 12:00 bajimango ua an·tangni ripengrang baksa picnic cha·na Mutong songona re·angahachim.
Moopun chidareona sokangon, uamangoni mitamrang chio jroe rona a·bachengaha aro chio jroe roengmitingo ia mande, sripe siaha.
Ia Moopun chidareara East Jaintia Hills a·jao mingsinggipa tourist spot ong·achim aro ia biapona dingtang dingtang biaprangoni manderang rona gita re·barongachim.
