SHILLONG: Shillong songjinmao Inter State Bus Terminus (ISBT)-ko rikanirang namjahani gimin Meghalaya a·dokni BJP dol, ma·mong sorkarina u·iatna gita tik ka·angaha.
Bristibar salo, a·dokni gitcham minister aro BJP-ni dilgipa AL Hek, BJP-ni central scheme monitoring committee-ni membor-rang baksa Mawlai Mawiong-o rikgipa ISBT-ko nieani ja·man kobor ra·timgiparang baksa agangrikengon, ia ISBT-ko rikanio gong kror 48.31 tangkarang koros ong·aha indiba ia ISBT-ko rikani kamrang namjahani gimin iani bidingo ma·mong sorkari aro North Eastern Council (NEC)-na u·iatna tik ka·aha ine parakataha.
“Indita koros ong·ani ja·man ISBT-ko namgija rikahani gimin chinga ma·mong sorkari aro NEC-na u·iatna tik ka·aha. Iani bidingo ma·mong sorkari nangani kri ja·kurangko de·angchina,” ine Hek parakataha.
ISBT-ko rikanirang namjani gimin inquiry-ko dakchina dabigenma ine sing·on, report-ko man·ani ja·manosa ma·mong sorkari nanga gita ja·kurangko de·gen ine a·dokni BJP-ni dilgipa parakataha.
Hek-ni aganani gitade, ia ISBT-ko nieani somoio Deputy General Manager Salseng A Sangma-ba dongpaahachim aro uamang pilakan ISBT-o be·srianirangko nikna man·aha.
“ISBT-ko rikanirang namjahani gimin chinga gipin a·dokrangoni re·baenggipa manderangna naljokaniko on·na nangnikenga. Ia ISBT-ko rikanirang namjani a·sel maiba dal·a a·selrang ong·na nanggenchimode ian a·dokna namgijani bimingko ra·baani ong·gen,” ine Hek aganaha.
ISBT-o generator-ko donchina aro re·ruraenggipa manderangna pre-paid taxi-rangko donchina gitaba BJP MLA, sorkariko didiangaha.
