AMPATI: Re·anggipa Bristibar attamo mikkarang jimbee waangan baksana balwaba ta·rakbee balanganichi, Ampati-o Meghalaya a·dokni bilsi 50 gapaniko manina tarisamsogipa stage, pandal, stall-rang aro ma·manti bosturang nosto ka·ako man·na nangahani gimin Sukrobar salo manina manchisogimin program-ko dontongatchengna nangaha ine South West Garo Hills a·jani Deputy Commissioner SK Marak u·iataha.
Iani bidingo u·iataniko on·angengon, gital u·iataniko on·taikujaskal da·o dipet ia program-ko dontongatchengenga ineba SWGH a·jani Deputy Commissioner parakataha.
South West Garo Hills a·jaoba Meghalaya a·dokni bilsi 50 gapaniko Sukrobar salo manina gita dingtangmancha program-rangko tarisomanahachim indiba rasong gribee Bristibar attamo mikka balwa ta·rakanganichi, ia biapo tarisogimin stage, pandal aro stall-rang nosto ong·atako man·tokahani gimin ia manianiko dontongatchengna nangao ga·akaha.
