Mawdiangdiang-o rikenggipa gital Assembly building-ni ‘dome’ be·grua

SHILLONG: New Shillong Township-ni Mawdiangdiang-o rikenggipa gital Assembly building-ni dome, Robibar pringwalni 12:30 bajimango be·gruaha. Ia dome-ko adita salrangna skangsan, ia gital Assembly building-o songahachim.
Rasong gnange ia a·sel ong·anio darangba saknaanirangko man·na gita nangjaha.
Ia a·selni bidingo PWD (Building)-ni Executive Engineer Ransom Sutnga, kobor ra·timgiparangna talataniko on·angengon, ia dome namen jregipa ong·ani gimin ia gital Assembly building-o dome-ko songna design tariani chu·ongjahani a·selsa ia dome be·gruna gita nangaha ine parakataha.
PWD official-ni parakatani gitade, ia dome-ni chuaniara metre 65-mang ong·engon, minar-ni chuaniara metre 13-mangsan ong·skaaiachim aro ia dome-ni jreaniara ton 70-mang ong·achim.
Ia be·grugimin dome-ko uamang antignini gisepon rongtalatgen aro dome-na gital design-ko taripiltaigen ineba Sutnga parakataha.
Ia gital design-ko uamang jachet ba jaskumangni gisepon matchotatgen ineba PWD (Building)-ni EE parakataha.
Ia gital Assembly building-o left wing, centre wing aro right wing-rang gnang ine talataniko on·angengon, ia gital Assembly building-o dome-ko songgipa biapsan nosto ong·atako man·aiaha ine Sutnga parakataha.
Ia building-ni nosto ong·gipa bakna contractor-ni bill-onikon kattipilna man·aigen ineba Sutnga parakataha.
Shillong songjinmani Mawdiangdiang-o rikenggipa a·dokni gital Assembly nokko sorkari, re·baenggipa September jao nokdonggana manchie donsoengachim ine nikna man·a. Indake ong·genchimoba da·o ia gital building-o songgimin dome be·gruahani gimin ia gital Assembly nokko matchotna gita somoiko nangdapskagnok ine niksamsona man·enga.
Ia gital Assembly building-ko New Shillong Township-o donggipa Mawdiangdiang-ni acre 80 ong·gipa a·ao rikengachim aro ia gong kror 127 ong·gipa project-ko Uttar Pradesh sorkarini PSU, Uttar Pradesh Rajkiya Nirman Nigam Ltd-na on·ahachim.
Shillong songjinmani Khyndailad-o donggipa gitcham Assembly nokko 2001 bilsio wa·al kamaonin ru·utbea bilsirangna Meghalaya Legislative Assembly, permanent building-ko man·chipkujaengachim.