TURA: South Garo Hills a·jani Gasuapara Land Custom Station gita niam gri Bangladesh-ona koela salani bidingo Maikel T Sangma minggipa mandeni badi ka·doangani ja·man, ia Land Custom Station gita koela salaniko Meghalaya High Court dontongataha.
Niam gri koela salani bidingo ia apsan mandean, a·dokni chief secretary-naba badi ka·doangahachim indiba maming ja·kurangko de·kujaengani gimin Bangladesh a·songona niam gri koela salruraaniko dontongatchina gita Meghalaya High Court, ge·etaniko on·ataha. Koelarangko salna gita Jai Maa Entreprise minggipa company-ni e-way bill-rangko jakkalengachim.
Sangma-ni badi ka·doangani gitade, maming permission gri aro badita koelarang donga, uko hisapchenggijasa koelarangko Gasuapara Land Custom Station gita Bangladesh a·songona salruraengachim.
Gipin a·dokrangoniko koela salbaenggipa garirangko North Garo Hills a·jani Dainadubi-o check ka·china aro Bangladesh-ona ong·katangenggipa koela garirangko South Garo Hills a·jani Gasuapara-o check ka·riktaichina ge·etani gnangsa, ia e-way bill-rangko jakkalna gita Jai Maa Entreprise-na order-ko a·dokni DMR office on·ahachim aro ia order ba ge·etanio pangchake, South Garo Hills a·jani Deputy Commissioner-ba koelarangko South Garo Hills a·ja gita salna on·engachim.
Indake ong·genchimoba, ia order-o Gasuapara-o galenga ine a·kangenggipa koelarangara badita donga, ukode maming janapa dongskajachim.
Ia biapo galenggipa koelarangko hisapchina gita re·anggipa April 29 tariko dingtangmancha mol·molani gnang chittiko seatahachim indiba ia biapo galgipa koelarangko hisapanirang dongjahani gimin, ia pilak niamrangko ja·rikkujaskal, koela salaniko dontongatchengchina Sangma, High Court-ko mol·moleaha.
Uandaken Gasuapara LCS gita Bangladesh-ona koela salruraaniko Budbar sal dipet dontongchina Meghalaya High Court ge·etaniko on·angaha. Iani bidingo May 30 tariko hearing-ko daktaigen ineba High Court parakataha.
