SHILLONG: Shillong songjinmani North East Indira Gandhi Regional Institute of Health & Medical Sciences (NEIGRIHMS)-o bakan Regional Cancer Centre-ko kulina siengahani gimin ian a·doko Cancer saenggipa manderangko sanna gita adita dakchakani ong·gnok.
NEIGRIHMS-ni Director Nalin Mehta-ni parakatani gitade, ia Regional Cancer centre-ni building-ko rikenggipa company, June jani gisepon NEIGRIHMS-na pakwate on·naba gnang ine ka·dongsotokenga.
“Cancer centre-ni nokko rikanio kamrang ru·utjawaha ine chinga ka·dongenga. Cancer centre-na mitam bosturangkoba chinga tarisoengaha aro kam ka·giparangko rakkina gitaba kamrangko ka·soengaha,” ine Mehta janapatenba, ia centre-ko jagittamni gisepon chalaina ka·dongenga ine parakataha.
Nalin Mehta-ni parakatani gitade, ia NEIGRIHMS campus-o nursing institute-koba rikengaha.
Meghalaya a·doko cancer sagiparangko sanchakram biaprang dongkujani gimin ia bilsini a·bachengachibarasan Meghalaya High Court, suk ong·gijaniko parakatenba, cancer sagiparangko sanna gita nambata cholrangko on·china a·dok sorkariko ge·etangahachim.
Da·o dipet Meghalaya a·doko cancer sagiparangko Shillong Civil Hospital-ni Cancer wing-oba sanna man·engaha indiba ia cancer wing-na sorkari, bosturangko sengdapkuengachim. Bosturangko sokbahaode ia cancer wing-o bang·bata manderangko sanna man·gnok ine official-rang parakataha.
