TURA: Mongolbar salo, All India Trinamool Congress (AITC) aro Opposition dolni dilgipa Dr Mukul Sangma, Ampati-o dingtangmancha tom·aniko ong·atangenba, tangka jakkalsretaniko aro dingtang dingtang jatrangni gisepo meli nangrime janggi tanganiko golmal ka·na jotton ka·enggipa dolrangni kosako warachakna gita ku·mikchetaniko dakangaha.
AITC dolko onbatgipa gadangonin bilakatna miksonganio Mukul Sangma, Mongolbar salo, dingtangmancha Ampati constituency-ni manderang baksa an·tangni noko tom·aniko ong·atangenba, manderangni neng·nikanirangko sing·sandie ra·angaha aro mikkangchi iandakgipa neng·nikanirangko warachakna ua ku·rachakaniko on·angaha.
Ia tom·anio Dr Sangma, songni nokni manderangna aganprakengon, AITC-ni miksonganirangko talate on·angenba, mikkangchi uamang manderangna nambata janggi tangani gadangko on·na jotton ka·gen ine ku·rachakaniko on·angaha.
“Meghalaya a·doko TMC dolko manderangni namgninasa bikotaha aro chinga tangka jakkalsretaniko bon·atna aro dingtang dingtang jatrangni gisepo meli nangrime janggi tanganiko golmal ka·na jotton ka·enggipa dolrangko warachakanggen,” ine Dr Sangma aganaha.
