BAGHMARA: A·ba o·e cha·aniko bon·atchina aro buring bolgrimrangko ripingchina gita Rongara-Siju constituency-ni MLA Rakkam A Sangma, re·anggipa Sombar salo, World Environment Day-ko maniani somoio, South Garo Hills a·jani manderangko didiangaha.
Ia World Environment Day-ko South Garo Hills a·jani Forest & Environment Department-ni ning·o donggipa Social Forest aro Territorial Division baksana South Garo Hills District Administration aro Basin Management Authority nangrimenba, Baghmara Government Higher Secondary School-o manidilangahachim.
Ia salko manianio Meghalaya Health Advisory Board-ni Chairman aro Rongara-Siju constituency-ni MLA Rakkam Sangma, mongsonggipa sokgipa ong·e jinmana aganprakangengon, dingtang dingtang susaanirang, jekai noksa salsusaani, slogan sesusaani aro essay sesusaanirangko chatro chatrirangna ong·atenba ia salko mandilangahani gimin ia program-ko ong·atgipa dolrangko mittelpilangaha.
Dingtang dingtang susaanirango chegiparangna an·tangni kusi ong·chakaniko parakangengon, iandakgipa program-rangko sorkari, u·i-ma·sianiko bariatna gitasa ong·atenga ine iandakgipa susaanirango bakko ra·china jolni chadamberangko didiangaha.
Samtangtango ong·telaigiparangko ripinge rakkiangkuchina gitaba ua jolo songdongenggipa manderangko didiangaha.
Ia World Environment Day-ko maniani bak gita dingtangmancha jinma bolrangkoba ge·angaha aro ia program-ko ong·atanio South Garo Hills a·jani Deputy Commissioner FM Dopth, District Forest Officer Maxborn M Sangma aro gipin officer-rangba dongpae bak ra·angaha.
