SHILLONG: Re·baenggipa 2023 bilsini Assembly election-ni ja·man, National People’s Party (NPP) aro United Democratic Party (UDP) dolrangni nangrime sorkari rikaniko Meghalaya a·doko niknaba gnang ine Bristibar salo, UDP-ni dilgipa Bindo M Lanong parakataha.
Lanong-niparakatanigitade, dingtang dingtang dolrangni da·o ong·enggipa obosta aro bilrangko nigenchimode mikkang bilsio NPP aro UDP dolrang nangrime sorkariko rikpiltaigen ine ka·dongsona man·enga.
“Meghalaya a·doko Congress dolni obosta namjaroroengaha, BJP dolba Meghalaya a·doko ja·dil su·na man·jaenga aro All India Trinamool Congress (AITC)-de da·omangmangsa a·doko napbaaha,” ine Lanong aganenba, election-ni somoirangoba da·o gitan ong·aiode NPP aro UDP dolrang nangrime sorkariko rikpiltaigen ine parakataha.
2018 bilsio gitade NPP-ba bilakjaha ine janapatengon, chonchongipa gipin dolrangde election-o bang·e chu·sokgipa ong·na man·jawa ine UDP-ni dilgipa parakataha.
MDA sorkarini kosako tangka jakkalsretani aro dingtang dingtang ong·gija kamrangna matnangani ja·manoba NPP baksa UDP bakrimna kusi ong·aikugenma ine sing·on, gitcham Congress sorkarini somoioba dingtang dingtang ong·gija kamrangna matnangako man·aha aro uarangoni mongsonggipade education scam-an ong·achim ine Lanong parakataha.
Election-na skang UDP, NPP baksa bakrimna miksonganirang dongama ine sing·on, da·o dipet iani bidingo UDP-ni dilgiparang chanchia dongkuja ine Lanong parakataha.