SSLC aro HSSLC Arts porikkani result-rangko paraka

TURA: Ia 2022 bilsini Secondary School Leaving Certificate (SSLC) aro Higher SecondarySchool Leaving Certificate (HSSLC) Arts porikkani result-rangko Sukrobar salo Meghalaya Board of School Education (MBOSE) parakataha.

Ia bilsini SSLC porikkao East Khasi Hills a·jani Marbisu-o donggipa St Paul’s Higher Secondary School-ni Amebaaihunsha Kharbih aro West Garo Hills a·jani Dalu-o donggipa Woodland School-ni Arghadeep Saha sakgnian 575 mark-rangko man·e  Top 20-ni skanggipa biapko man·aha. Shillong St Anthony’s Higher Secondary School-ni Menangmankhraw Kharkongor aro Shillong Auxilium Girls HS School-ni Rilaakor Lamare sakgnian 569 mark-ko man·e gnigipa biapko man·skaaha aro Tura Sherwood School-ni Arghadeep Ghosh, 568 mark-rangko man·e Top 20-ni gittamgipa biapko man·rikskaaha.

Ia bilsini SSLC porikkao Garo Hills gimikoni sak 11 chatro chatrirang, Top 20-o biapko man·rikaha aro uamangoni gipinrangara, Tura Embee Rosebud Secondary School-ni Subhamita Chowdhury (6^th position), Bhaitbari Higher Secondary School-ni Nice Parvin Begum (9^th position), Bhaitbari HS School-ni Fatema Jasminara Begum (10^th position), Dalu Woodland School (private)-ni Biambong A Sangma (11^th position), Tura Sherwood School-ni Dibya Sundar Banerjee (19^th position), Tura Sherwood School-ni Sanskriti Kumari Mishra (19^th position), Tura Sherwood School-ni Tanisha Das (19^th), Phulbari Jawaharlal Nehru Higher Secondary School-ni Omor Faruk Sk (19^th position) aro Phulbari Jawaharlal Nehru HS School-ni Mehedy Hasan Mollah (20^th position) ong·a.

Ia bilsini SSLC porikkako a·dok gimikoni sak 57,371 chatro chatrirang seahachim aro ia sak 57,371 chatro chatrirangoni sak 32,678 chatro chatrirang chu·sokgipa ong·aha.

SSLC porikkao East Jaintia Hills a·jani pass percentage 82.36 percent ong·e a·doko bang·batgipa ong·aha aro South West Garo Hills a·jao 26.45 percent ong·e komibatgipa ong·skaaha.

SSLC porikkao district-ni gita pass ka·ani percentage-ranga East Garo Hills-o 39.31%, West Garo Hills-o 41.10%, South Garo Hills-o 31.63%, East Khasi Hills-o 75.05%, West Khasi Hills-o 65.34%, Ri Bhoi-o 63.60%, South West Garo Hills-o 26.45%, North Garo Hills-o 36.33%, South West Khasi Hills-o 64.10%, East Jaintia Hills-o 82.36%, Eastern West Khasi Hills-o 71.50% aro West Jaintia Hills-o 77.51% ong·aha.

Indake ong·engon, ia bilsini HSSLC Arts porikkao Tura Don Bosco College (Higher Secondary Section)-ni Ramyank Nilabh Chakraborty, 460 mark-rangko man·e Top 10-ni skanggipa biapko man·skaaha, Shillong Auxilium Girls HS School-ni Bahunlang Mawrie, 450 mark-rangko man·e gnigipa biapko man·aha aro Shillong St Anthony’s HS School-ni Vijay Adhikari, 436 mark-rangko man·e gittamgipa biapko man·skaaha.

Tura Town Higher Secondary School-ni Ankita Bose-ba 421 mark-rangko man·e, Top 10-ni chikkinggipa biapko man·rikpaaha.

Ia bilsini HSSLC Arts porikkako gimik sak 22,711 chatro chatrirang seskaaha aro ia sak 22,711 chatro chatrirangoni sak 18,434 chatro chatrirang pass ka·skana man·aha.

HSSLC Arts porikkao Eastern West Khasi Hills a·jani pass percentage 96.25 percent ong·e a·dok gimiko bang·batgipa ong·aha aro South Garo Hills 55.67 percent ong·e komibatgipa ong·skaaha.

HSSLC Arts porikkao district-ni gita pass ka·ani percentage-ranga East Garo Hills-o 69.44%, West Garo Hills-o 69.18%, South Garo Hills-o 55.67%, East Khasi Hills-o 91.09%, West Khasi Hills-o 90.05%, Ri Bhoi-o 85.99%, South West Garo Hills-o 61.42%, North Garo Hills-o 68.85%, South West Khasi Hills-o 91.94%, East Jaintia Hills-o 90.48%, Eastern West Khasi Hills-o 96.25% aro West Jaintia Hills-o 81.42% ong·skaaha.