SHILLONG: Re·anggipa April 1 tarikoni mikkarang dontonggija waanganichi Meghalaya a·dok gimiko sak 13 manderang siangna nangaha aro lak 5.43-na baten manderang nangchakeaniko man·na gita nangtokaha. Mikkarang dontonggija waanganichi a·dok gimiko dam 581 songrangba nangchakeaniko man·angaha.
Mikkarang dontonggija waanganio chirang dal·bae aro a·arang rurongdape te 3,890 nokrang nosto ka·ako man·aha aro unbaksana manderangni rama jal·langrang, dokkanrang, skulrang aro Anganwadi centre-rangba nosto ka·ako man·angaha.
Meghalaya a·dokni Disaster Management Minister Kyrmen Shylla-ni parakatani gitade, Garo Hills aro a·dokni pilak biaprangon chi bananirangko sorkari name nirokenga aro name hisapenga.
Batanggimin konta 48-ni gisepo mikkarang waanganichi, West Garo Hills a·jani Tura jillao a·a ruronganiko nikna man·taiaha aro Barengapara Subdivision-o chirang bananichi sak 24 manderang neng·nikanirangko man·angtaiaha ineba Shylla parakataha.
A·dokni dingtang dingtang biaprango aro mongsongbate Garo Hills-o deputy commissioner-rangko aro official-rangko mikrake dongchina u·iataha aro uamang obostarangko name nirikkienga ineba Minister parakataha.
Shylla-ni parakatani gitade, chirang bananichi aro a·arang be·dapanichi neng·nikanirangko man·enggipa manderangna Disaster Management department, nanga gita dakchakanirangko on·enga aro nangani kri dakchakanirangko on·china gita deputy commissioner-rangna gong lak 50-ko on·ataha.
“Chinga man·a dipetde chel·chakanirangko on·na jotton ka·enga indiba iandakgipa obostaode an·ching pilakan mikrake dongna nangenga,” ine Shylla aganaha.
Nokrangko aro ramarangko tarianio iandake nosto ong·anirangko komiatna gita niamrangko ja·rike rikchina contractor-rangko ge·etmanaha ineba Disaster Management Minister parakataha.
“Da·o gita wachini somoirango songre songgabatengon aro mongsongbate a·a ruronggipa biaprango manderang namen simsakna gita nangenga,” ineba ua aganaha.
Bilsiantian iandakgipa a·selrangko chagrongna nangrongengani gimin 15th Finance Commission-ni gitaba department-na tangka paisarangko chame on·aha ineba Minister parakataha.
