SHILLONG: Meghalaya a·dok gimikon mikkarang dontonggija waenganichi chirang banne aro a·arang be·e neng·nikanirangko man·enggipa manderangna nanga gita dakchakanirangko on·china a·dokni Chief Minister Conrad Sangma, dingtang dingtang a·jani deputy commissioner-rang aro dingtang dingtang department-rangna ge·etaniko on·angaha.
Mikkarang dontonggija waengani a·sel a·dokni dingtang dingtang biaprango ong·enggipa obostarangni gimin ma·sie ra·na gita Bristibar salo a·dokni Chief Minister, a·dok gimikni deputy commissioner-rang aro nangchakegipa department-rang baksa internet gita tom·e chanchirimangenba, neng·nikanirangko man·enggipa manderangna pilak nanga dakchakanirangko on·china ge·etangaha.
Bristibar salo, mikkarang dontonggija waanganichi a·arang ruronge, salgro salaramni gipin a·dokrangona dakanggipa ramarang champengataniko man·ahani gimin, duko ga·akenggipa manderangna pilak nanga dakchakanirangko on·china aro ta·raken kamrangko ka·china gita Chief Minister, ge·etaniko on·angaha. Nangchongmotgipa bosturangko salbaenggipa gari gorarang a·dokona re·bana man·na gita niroke kamrangko ka·china gitaba ua ge·etangaha.
Kamrangko ka·dilna gita a·ja ge·antion regional committee-rangkoba songe donataha aro ia committee-rangko dilna seokako man·gipa manderangara, East Khasi Hills aro Ri Bhoi a·jana a·dokni Deputy Chief Minister Prestone Tynsong, Jaintia Hills a·jarangna Home Minister Lahkmen Rymbui aro Kyrmen Shylla, West Khasi Hills, South West Khasi Hills aro Eastern West Khasi Hills a·jana Minister Renikton Lyngdoh Tongkhar aro Garo Hills a·jarangna Minister James Sangma ong·a.
A·jatangtango ong·enggipa obostarangko name nirikkichina aro biaprangona re·e nirokchina gitaba ua regional committee-ni chairman-rangko mol·molataha.
Da·o konta 72-ni gisepo obostarang namjabatnaba gnang ine mikrakbate kamko ka·china aro manderangni namjokgnina kamko ka·china gitaba a·dokni Chief Minister, dingtang dingtang a·jani deputy commissioner-rangko aro department-rangko ge·etangaha.
