Mawkyrwat: Antisana baten mikka badrianichi da·o South West Khasi Hills District Ranikor Civil Sub-Division ning·o donggipa Borsora aro Maheskola jolrango nok-jamrang nosto ong·e, chi bana re·e aro rama-jal·angrangko chi man·pakange namen neng·nikaniko man·enga.
June 17-o jimbee mikka waanichi Maheskola aro Koraibari songo chi bana ong·aha aro nok-jamrang aro Maheskola-ni anti-bajar biapo dokkanrang nosto ong·tokaha aro nangchongmotgipa mal-bosturangko man·chape jemangani gam-jinrang bang·en noksan ong·aha ua a·jolni manderangna misilgipa obosta ong·aha ine All Khasi Hills A·chik Federation (AKHAF)-ni General Secretary Manuel Ch Marak aganaha.
China bana bilongaha indake Rajai, Borsora, Cherragao aro Alikwareng-ni rama-jalangrangko chi man·pakangtokaha. Khatphra-oni Nongjri-ona dakanggipa National Highway aro IBBR rama jimbee mikka waanichi obosta dongsrangjaha indake ja·achi re·gipa manderang namen neng·nikanirangko chagrongengaha, Marak aganaha.
Uni gimin manderangni namgnina chol ong·genchimode pilak obostarangko niechina aro nosto ong·gipa ramarangko taripiltaina man·a gita Ranikor Civil Sub Division-ona re·bae nirokechina AKHAF, bil gnanggiparangko mol·molataha.
Chi banachi aro a·a ruronganirangchi jemangani gam-jinrang gimaa-nisiako man·aha uandakgipa duko a·selo ga·akgipa nokdangrangna tangka-paisani dakchakanikoba sorkari on·angna nanga, ua aganaha.
