WILLIAMNAGAR: Rongjeng-Adokgre ramani kilometre 22 ong·gipa bakkode re·baenggipa December jani gisepo matchotgnok ine PWD (Roads) department-oni u·iataha.
Rongjeng-oni Adokgre-ona dakanggipa ramako tarina gita 2017 bilsion, gong kror 210 korosko hisape, a·dokni gitcham MUA sorkari a·bachengatahachim aro ian Rongjeng aro Adokgre songni gisepo donggipa manderangna ka·dongataniko ra·baani gitaba ong·ahachim.
Ia km 54 ong·gipa ramako tarina NEC, gong kror 86-ko aro NLCPR, gong kror 123-mangko chame on·ani ong·achim indiba ja·mano dingtang dingtang neng·nikanirangko pa·sike, ia ramana tangka paisa chamaniko NEC ra·pilskaaha ine PWD official-rang parakataha.
Ia project-na NEC-ni gita dakchakaniko on·jahani gimin NLCPR-mangmangchisan da·o ia project-na tangka gong kror 123-ko chamskaengachim.
NEC-ni ia project-oni ra·pilani a·sel contractor-rang neng·nikanirangko chagrongna nangtokaha maina NEC-ni ra·pilani somoio ia ramako tarigipa company-rang, Detailed Project Report (DPR)-o ong·gija mitam bakrangkoba kam ka·skaahachim ine official-rang parakataha.
Ia ramani kamrangko bakgni dake, chong·motan chu·gimik ramana a·a tariani kamko Tura-ni M/S Sun Infratech-na on·e, black topping on·ani kamkode M/s CCL-na on·skaahachim aro uandaken ia dolgnian, gipin kamrangko ka·na skang, dolsa dolgipinni kam matchotaniko sengna nangskaaha ineba PWD official-rang parakataha.
“NLCPR-ni chamgipa tangka paisarangchi chinga DPR-ko taripiltaina nangaha aro gipin bakrangnaba gipin dolni tangka paisa chamanina gipin DPR-ko tarina nangaha. Chinga da·o NERSDS-ni sanction ka·anina sengna nangkuenga. Ia ramani bang·bata earthwork-rangan matchotengaha aro mikkang namangahaode ia ramani km 22 ong·gipa bakkode December jani gisepo matchotatna jotton ka·gnok,” ine PWD (Roads)-ni executive engineer parakataha.
NERSDS-oni tangka paisarangko ta·raken sanction ka·genchimode uamang ia ramani gipin bakrangkoba re·baenggipa 2023 bilsini February jani gisepon matchotatna miksongenga ineba PWD officer parakataha.
