SHILLONG: Adita salrangna skang, mikkarang dontonggija jime waanganichi, East Khasi Hills a·jani Mawsynram block-o a·a be·dapgipa biaprangko a·dokni Chief Minister Conrad K Sangma, Mawsynram-ni MLA HM Shangpliang baksa nieaha.
Mawsynram block-ni ning·o donggipa , Dangar-o a·a be·dapanichi bi·sa sakbriko man·chape gimik sakbonga manderang siangna gita nangahachim aro Kynmynsaw-oba a·a rurongdapa man·e, nokdangni ma·a paa, dedrangko wate siangna gita nangahachim.
Ia biaprangko nieani somoio a·dokni Chief Minister aro Mawsynram-ni MLA, a·a be·dapa man·gipa nokdangrangkoba grongeaha aro ia nokdangrangna sorkarini on·enggipa tangka paisarangkoba on·angjolaha.
Ia jolrangona re·angani somoio a·dokni Chief Minister, songni nokni dilgiparangkoba gronge, pilak nanga dakchakanirangko on·na ku·rachakbaaha.
Mikkarang jimbee waanganichi ia jolrango bijoli aro mobile network-rang nosto ong·atako man·na nangahani gimin ua bijoli aro mobile network-rangko on·piltaina gitaba ku·rachakaniko on·baaha.
