TURA: South Garo Hills a·jaoba mikkarang dontonggija waanganichi, bang·bea rama jal·langrang, nok-jamrang aro bagan barirang nosto ka·ako man·na nangahani gimin Budbar salo, a·dokni Chief Minister Conrad K Sangma, South Garo Hills a·jani Karukol aro Siju jolrangona re·ange, nosto ka·a man·gipa biaprangko niangaha.
Iana skang, ua Baghmara-ni Bolsalgre gittimo a·a be·dapa man·e sianggipa mande sakgittamni nokdangona re·ange, sorkarini on·enggipa ‘ex-gratia’-ni tangka paisarangko on·angjolaha.
Re·anggipa June-ni 17 tariko, mikkarang jimbee waanganichi, a·arang rurongbae, Baghmara-ni Bolsalgre gittimo nokdang ge·sako be·dapeahachim aro ia a·sel ong·anio nokni segipa, jikgipa aro uamangni bilsibri ong·gipa bi·saba siangna gita nangahachim. Budbar salo, a·dokni Chief Minister, sianggipa mande sakgittamni nokdangona re·ange, sakprako gong lak 4 tangkarangko, dongrikenggipa nokdangni manderangna on·baaha.
Sombar walo Masighat-o ramarangko rongtalatengmiting somoio JCB gnang a·kuangchi ga·akonange sianggipa JCB driver-ni nokdangnaba apsan salon a·dokni Chief Minister, tangka paisarangko on·bajolaha.
South Garo Hills a·jao mikkarang jimbee waanganichi, rama jal·langrang bang·en nosto ka·ako man·na gita nangaha aro uandaken Budbar salo, a·dokni Chief Minister, Karukol-oni Siju-ona ringo songreange, chi bangipa aro a·a rurongdapgipa biaprangko niangaha.
Iani ja·mano ua, Siju-oni Rongdong-onaba km 10-mang ong·gipa ramako doange, a·a be·dapgipa aro a·a ruronggipa biaprang baksana nosto ong·atako man·gipa rama jal·langrangkoba niangaha ine kobor on·timgiparang u·iataha.
Kobor on·timgiparangni u·iatani gitade, mikkarang jimbee waanganio nosto ka·a man·gipa rama jal·langrang aro dingtang dingtang biaprangko sorkari taripile on·na jotton ka·enga indiba ia rama jal·langrang aro dingtang dingtang biaprangko taripilna gita komibeoba adira jarangkode nangaignok.
Iana skang, Mongolbar salo a·dokni Chief Minister Conrad K Sangma, Dalu-ni MLA Brening A Sangma, dingtang dingtang department-ni official-rang aro BSF-ni official-rang baksa, South aro West Garo Hills a·jani gisepo donggipa biaprangona re·ange, mikkarangchi nosto ka·a man·gipa rama jal·langrang aro gipin biaprangkoba niangaha.
Uni Dalu-ona sokangani ja·man uko, BSF-ni DIG Alok Kumar Singh aro gipin official-rang rimchaksoaha. Uni Dalu-o BSF aro gipin official-rang baksa dikdiksa tom·anio ua, chi banani somoirango manderangna dakchakanirangko on·engani gimin BSF dolko aro gipin official-rangkoba mittelpilangaha.
