SHILLONG: 1973 batch-ni Indian Police Service (IPS) officer-rangna Budbar salo, reunion conference-ko Shillong songjinmani Umling-o donggipa Border Security Force (BSF) Meghalaya Frontier-ni headquarter-o ong·atangaha aro ia conference-ko ong·atanio a·song gimikonin 1973 batch-ni IPS officer-rang re·bae bakko ra·angtokaha.
Ia conference ba tom·bimonganiko ong·atanio IPS officer-rangni jikgiparangba bakko ra·angaha.
Ia reunion conference-ko ong·atani bidingo IPS officer RK Johri, jinmana talate on·angengon, COVID sajinmani somoio uamang social media gitasa saksa sakgipin baksa agangrikna nangachim indiba da·alo ia reunion conference-ko ong·atanichi police officer-rang saksa sakgipinko gronggriktaina chol ong·aha ine parakangaha.
Ia tom·bimonganiko ru·uta somoirangni ja·mansa ong·atna man·aha aro ian ia conference-ni mongsonggipa miksonganiba ong·a ineba Johri aganaha.
Bang·bata police officer-rangan Meghalaya a·dokona re·bakujachim aro Meghalaya a·dokni gimin photo aro video-rangonikosan niksona man·aiengkuachim ine janapatengon, da·alo ia reunion conference-ko ong·atanichi a·songni dingtang dingtang biaprango donggipa IPS officer-rangan, Meghalaya a·dokona re·bae a·dokni nitoaniko mikrontangchi nike ra·na man·aha ine Johri parakataha.
“Ian an·ching pilaknan namen nambegipa chol ong·aha,” ine ua aganaha.