TURA: International Day Against Drugs Abuse & Illicit Trafficking-ko maniani bak gita Sombar salo, East Garo Hills a·jani District Social Welfare Office, dingtangmancha awareness program-ko Williamnagar-ni Green Yard Higher Secondary School-o ong·atangaha.
Ia program-ko ong·atanio Williamnagar-ni Additional Deputy Commissioner DA Sangma, mongsonggipa sokgipa ong·e jinmana aganprakangengon, pekatgipa samrangoni an·tangtangko chel·e rakkichina gita skulo poraienggipa chatro chatrirangko didiangaha.
Drugs ba pekatgipa samrangko jakkalani aro badinganiara niamni kosako re·ani gita ong·a ine talataniko on·angengon, pekatgipa samrangko jakkalgipa manderangde ia namgijagipa bewaloni ong·katna namen neng·ani ong·aha ine Sangma, iandakgipa bosturangoni chel·e dongchina, chatro chatrirangko didiangaha.
Ia program-ko ong·atanio dongpae jinmana aganprakanggipa gipin manderangara, District Legal Services Officer JN Arengh, Williamnagar Police Station-ni Officer-in-Charge SM Sangma, Williamnagar DM&HO-ni official-rang aro Green Yard Higher Secondary School-ni Headmistress DM Sangma ong·a.
