SHILLONG: Meghalaya Medical Services Association (MMSA)-ni dingtang dingtang nangnikanirangko a·dokni Health Minister James PK Sangma baksa agangrikgen ine a·dokni Chief Minister Conrad K Sangma-ni ku·rachakaniko man·ahani gimin Mongolbar sal dipet jingjengatna manchianiko MMSA-ni state executive committee (SEC) ra·galatpilaha.
MMSA-ni nangnikenggipa kamrangni gimin Health Minister baksa agangrikgen ine kobor ra·timgiparangna Chief Minister-ni parakatani ja·man MMSA-ni jingjengataniko ra·galatpilaha ine MMSA-ni SEC parakatskaaha.
“Anga bebera·a MMSA-ni nangnikenggipa kamrangni bidingo department, maiba ja·kurangko de·enggnok. Uamangni neng·nikanirangko ta·raken namatna nanga,” ine Chief Minister aganaha.
Indian Institute of Public Health (IIPH)-ni kosako ja·ku de·china dabienggipani bidingo a·dok sorkari maming ja·kurangko de·jaengani gimin Mongolbar pring dipet konta 24-na Meghalaya Medical Services Association (MMSA)-ni ning·o kamko ka·enggipa doctor aro dingtang dingtang official-rang, kamrangko dontongatna tik ka·angahachim.
Health Services (MI)-ni Director Aman War-ko ong·gija dake matnangahani gimin Shillong-o donggipa IIPH-ni Registrar aro Director-ni kosako nanga gita ja·kurangko de·china dabie, re·anggipa June 1 tarikon MMSA, a·dokni Health Minister-na sedoatahachim.
