TURA: Me·chik bi·sarangko bilsisana drae til·ekahani gimin Rasthy A Sangma minggipa mandeko, POCSO Act-ni ning·o bilsi 20-na pattoko donatan baksana gong 25,000-ko dai gamchina gita West Garo Hills-o Special Judge (POCSO)-ni kachari raiko on·ataha.
Police-rangni u·iatani gitade, dos dakgipa mandeni kosako 2020 bilsini March 14 tariko Tura Women Police Station-o FIR ka·aha aro uni kosako police-rang, 2021 bilsini November 21 tariko charge sheet-ko ka·aha.
Dos dakgipa mandeni kosako apsan police station-on apsan dakgipa mamlana FIR-ko ka·aha aro da·o ia mandeko ia case-ni giminba kachario bichal ka·enga ine police-rang u·iataha.
Indake ong·engon, 2016 bilsini October 4 tariko me·chik saksak, uni a·baoniko me·su samjak akna re·angmiting somoio drae til·ekaha ine badi ka·ako man·ahani gimin Beatbeat Ch Marak minggipa mandekoba bilsisnina pattoko donatan baksana gong 10,000 tangkako dai gamchina Tura-ni District & Sessions Judge court rai on·ataha ine kobor on·aha.
Dos dakgipa mandeni kosako Tura Women Police Station-o FIR ka·ani ja·man, ia a·selni bidingo am·sandianirangko dake police-rang, 2017 bilsini July 31 tariko charge sheet ka·ahachim.
