HILLONG: Shillong songjimao donggipa Umiam dolongo be·srianirang donganichi kenchakna nanganirang ong·engani gimin ia dolongko ta·raken tarina gita didichina Bristibar salo, Khasi Hills Autonomous District Council (KHADC)-ni Opposition Congress dol, KHADC-ni Executive Committee (EC)-ko didiatskaaha.
KHADC-ni council summer session-ko ong·atanio Mylliem-ni Congress MDC Ronnie V Lyngdoh, Umiam dolongni gimin chanchirimaniko dakdilangengon, ia dolongna dongimin somoi bon·ahani gimin ia dolong je somoioba be·gruani cholrang dongaia ine parakatenba, ia dolongni bidingo ta·raken a·dok sorkari baksa agangrikchina EC-ni dilgiparangko didiataha.
“Umiam warini ka·machipak donggipa songrangnade ian namen kenchakna nangani ong·batenga maina ia dolong be·ahaode gimik songrangkon man·anggnok,” ine Lyngdoh aganaha.
Ia dolongni gimin sorkari ma·sigenchimoba da·onan ia dolong gita sam 16 chakka donggipa garirang re·rurakuenga ineba Lyngdoh, an·tangni suk ong·gijaniko parakataha.
Apsan daken, Opposition dolni dilgipa PN Syiem-ba ia dolongna an·tangni jajrengchakaniko parakatenba, iani bidingo ta·raken a·dok sorkarina seatchina EC-ni dilgiparangko didiangaha.