SHILLONG: Meghalaya a·dokni SSA skulrango skigiparangni dabianirangko sorkari knachakjaengani gimin July-ni 15 tarikoni Shillong songjinmani Additional Secretariat sambao donggipa parking lot-o jinma dontonggija asonge jingjengatangna gita All Meghalaya SSA Teachers Association (AMSSATA) tik ka·angaha.
Ia jingjengataniko skigiparang, salantian pring 10:00 bajioni attam 4:00 bajiona dakangna tik ka·aha.
SSA skulrango skigiparangna jabongani dormaharangko aro jachetni arrear-rangko sorkari on·kujaengani gimin July 15 tarikoni dontonggija jingjengatna AMSSATA tik ka·angaha.
“Chingni dabianirangko July 12 tarikni gisepo chu·sokatjagenchimode chinga dontonggija jingjengatanggen ine chinga a·bachengon parakmanahani gimin July 15 tarik dipet dontonggija jingjengatangna tik ka·aha,” ine AMSSATA-ni general secretary Defender S Lamare, kobor ra·timgiparangna parakataha.
Iani bidingo uamang July-ni 5 tarikon memorandum-ko on·manahachim aro iani bidingo uamang Chief Minister Conrad Sangma-ko grongna tik ka·ahachim ineba ua parakataha.
Indake ong·genchimoba, Lamare-ni parakatani gitade, a·dokni Chief Minister gipin kamrango jakchakgija ong·ahani a·sel uko grongna man·jaha aro a·dokni Education Minister Lahkmen Rymbui-ba Delhi-osa ong·e ukoba grongna man·jahachim.
Indake ong·engon, iani bidingo uamang a·dokni Governor Satya Pal Malik-naba memorandum-ko on·aha aro ua skigiparangni gimin CM baksa agangrikna ku·rachakataha ine AMSSATA-ni general secretary parakataha.
Ia jingjengatanio bakko ra·pachina gita ua All Garo Hills SSA School Teachers Association aro Meghalaya SSA School Association-koba mol·molataha.